په لوګر کې د نجونو یوه ښوونځي له زده کوونکو سره مرسته وشوه.

پل علم
د لوګر د پوهنې ریاست د ویاند دفتر
سې شنبې، ذوالقعدې ۳ مه، جوزا ۲ مه

د لوګر مرکز پل علم اړوند د هوني سیدانو د نجونو منځني ښوونځي له ۲۱۰ زده کوونکو سره د ښوونځي جامو، حجابو، درسي توکو او بوټانو مرسته وشوه.

دغه مرسته په کاناډا کې مېشت د پوهنې د یوه تن مینه وال انجینر محراب الدین احمد یار له خوا شوې ده، چې شاوخوا ۱۲۴ زره افغانۍ ارزښت لري.

په دې مرسته کې هرې زده کوونکې ته یوه جوړه د ښوونځي شرعي جامې او حجاب،۵ ټوکه کتابچې، یو قلم، یو پنسل، یو پنسل تراش، یو پنسل پاک او یوه جوړه بوټان ورکړل شوې دي.

د لوګر مرکز پل علم د پوهنې آمر انجینر حبیب نور حیدري د یادې مرستې د وېش پر مهال د انجینر محراب الدین احمد یار له مرستو څخه ځانګړې مننه او د ورته مرستو د دوام غوښتنه وکړه.

د یادونې وړده، چې په تېرو کلونو کې هم د نوموړي ښوونځي له زده کوونکو سره یاد کس د ښوونځي جامو او قرطاسیې مرستې کړې دي.