د لوګر ښوونځیو ته د درسي کتابونو وېش پیل شو.

پل علم
د لوګر د پوهنې ریاست د ویاند دفتر
شنبې، رمضان المبارک ۱۸ مه، حمل ۲۰ مه

د لوګر ولایت د مرکز او ولسوالیو پر ۲۷۵ ښوونځیو د ښوونیز نصاب د نوېو چاپ شوېو درسي کتابونو د وېش بهیر پیل شو.

د یاد بهیر د پرانیستنې په مراسمو کې د پوهنې سرپرست او تدریسي مرستیال مولوي عبیدالله هشام او د پوهنې وزارت د نشراتو او عامه اړیکو ریاست استازو ګډون کړی وو.

دا بهیر د پوهنې وزارت د نشراتو او عامه اړیکو ریاست په لارښوونه پیل شو، چې د شاوخوا یوې اوونۍ په موده کې به ټولو ښوونځیو ته ورسول شي.

د پوهنې وزارت له خوا ؛ لوګر ته ۲ لکه ، ۳ زره او ۸۱۹ ټوکه د ښوونیز نصاب کتابونه را لېږل شوي، چې پر ۲۷۵ ښوونځیو به ووېشل شي.

په نوموړو کتابونو کې له لومړي تر لسم ټولګي په پښتو او دري ژبو د بېلا بېلو مضمونونو نوي چاپ شوي کتابونه شامل دي، چې په وېش سره به یې تر ډېره د زده کوونکو د درسي کتابونو د کمښت ستونزه هواره شي.

د یادونې وړده، چې ډېر ژر به د پوهنې وزارت له خوا لوګر ته ۵ لکه او ۳۸ زره ټوکه نور د ښوونیز نصاب نوي چاپ شوي کتابونه هم را ولېږل شي.