د سي آی اې پخوانۍ مامورې او استخباراتي شنونکې

د سي آی اې پخوانۍ مامورې او استخباراتي شنونکې، سارا اډمز د جان شاه ساپي د نیول کېدو په اړه جدي شکونه څرګند کړي او د امریکا د حکومت د ادعاوو د لا روښانتیا غوښتنه یې کړې ده.

اډمز ویلي چې لومړنۍ څېړنې ښيي، د امریکا کورني امنیت وزارت له لوري د ساپي پر ضد وړاندې شوې ادعاوې د داخلي استخباراتي معلوماتو له ارزونو سره سر نه خوري.

جان شاه ساپی، چې د جمهوري نظام پر مهال یې د ملي امنیت چوکاټ کې د لوړې کچې دندې ترسره کړې وې، تېره اوونۍ د امریکا د کډوالۍ اړوندو چارواکو له خوا د داعش خراسان څانګې سره د احتمالي اړیکو په تور نیول شوی دی.

په عین حال کې، د جمهوري نظام د پخواني جنرال، سمیع سادات غبرګون هم دا قضیه لا ګرمه کړې ده. سادات ویلي: "موږ نه ناقانونه یوو او نه هم پردي؛ موږ هماغه کسان یوو چې د امریکا د ماموریت ملاتړ مو کړی."

سمیع سادات او د هغه نږدې ملګري وايي، ساپي د امریکايي ځواکونو ترڅنګ د طالبانو او داعش پر ضد رسمي عملیات ترسره کړي او حتی همدا اوس د طالبانو د استخباراتو په هغه رسمي لېست کې شامل دی چې باید ووژل شي.

سادات ټینګار کړی چې د ۲۰۲۱ کال تر سقوط وروسته امریکا ته راوړل شوي افغانان د قانوني پروسو له مخې انتقال شوي او د هغوی بدنامول او له امریکا ایستل به "نه یوازې بې عدالتي وي بلکې هغو خلکو سره به خیانت هم وي چې د امریکا لپاره یې خپل ژوند په خطر کې اچولی و."

دغه راز، د امریکا د سنا دوو غړو، مارک وارنر او تیم کین د ساپي نیول کېدل د اندېښنې وړ بللي او د قضیې لپاره یې د بشپړ شفافیت غوښتنه کړې ده. هغوی خبرداری ورکړی چې که ساپی افغانستان ته وشړل شي، د طالبانو له لوري د وژلو جدي خطر ورسره مل دی.

سارا اډمز په خپل بیان کې لیکلي: "د داخلي ISKP (داعش خراسان) اړیکو له مخې، ساپی د دې ډلې غړی نه ښکاري. برعکس، هغه د طالبانو په هغه لېست کې دی چې د پخوانیو NDS (ملي امنیت) چارواکو د وژلو لپاره جوړ شوی دی. که دا تورونه د همدې سرچینو پر اساس جوړ شوي وي، نو د قضیې سرچینه باید په جدي توګه و ارزول شي."

په ټوله کې، د ساپي د نیونې قضیه اوس د امریکا دننه د امنیتي کړیو، پخوانیو نظامي همکارانو او سیاستوالو تر سختو پوښتنو لاندې ده او ګڼې نښې ښيي چې د هغه د داعش تړاو په نوم وړاندې شوې ادعاوې د لا جدي څېړنې اړتیا لري.

#ABN #Afghanistan #CIA #USA @realDonaldTrump #JanShahSafi @SayedSamiSadat @TPASarah