د لوګر د خوښۍ ولسوالۍ د ښوونځیو مدیرانو،ښوونکو او والدینو شورا روزنه پیل شوه

پل علم
د خپرونو او اطلاع رسولو مدیریت
چهارشنبه، شعبان المعظم ۲۴ مه ، کب ۱۶ مه

د لوګر د خوښۍ ولسوالۍ د ښوونځیو ۱۷۴ مدیرانو، د سیمه ییزو ټولګیو ښوونکو او د والدینو شورا غړو ته د ماشومانو حقونو پېژندنې په تړاو روزنه ورکول کېږي.

د یادې روزنې د پیل په مراسمو کې چې د ناظر کلا په ښوونځي کې جوړه شوې وه د پوهنې ریاست د عمومي زده کړو او د ښوونکو د روزنې مرستیال حاجي ابراهیم حمدي په ګډون د پلان او راپور ورکولو مدیر محمد جمیل قبادي ،د پوهنې آمر مولوي عبدالواحد زبیر،د وایفا مؤسسې ولایتي مسوول کامران سادات او یو شمېر ځایي مسوولینو برخه اخیستې وه.

دا څلور ورځنی روزنیزه دوره د پوهنې ریاست په هلو ځلو د وایفا مؤسسې له خوا د یونیسف په مالي ملاتړ جوړ شوی، چې موخه یې د ماشومانو حقونو ته پاملرنه کول او ورته د تعلیم زمینه برابرول دي.

په دغه روزنیزه دوره کې به د ښوونځیو ۱۴ مدیرانو ، د سیمه ییزو ټولګیو ۶۶ ښوونکو او د والدینو شورا ۹۴ غړو ته د ماشومانو حقونو پېژندنې د دوی د ساتنې،خوندیتوب او د تعلیم زمینې برابرولو په هکله روزنه ورکړل شي.

دا په داسې حال کې ده،چې پرون هم د لوګرد محمدآغې ولسوالۍ ۲۸۵ تنه د پوهنې کارکوونکي،د سیمه ییزو ټولګیو ښوونکي او د والدینو شورا غړي له ورته روزنیز ورکشاپ څخه فارغ شوي دي.