خبرداری: دا راپور د جنسي ځورونې په اړه معلومات لري چې لوستل یې ځینې خلکو ته دروند تمامېدای شي

یوه ۱۳کلنه  نجلۍ، چې دلته یې د “اریا” په مستعارنوم یادوو، ادعا کوي چې د یو جومات امام د درملنې په پلمه پرې جنسي تېری کړی و.

دغه سړی، عبدالحلیم خان، د لندن په ختیځ کې امام و او کورنیو ته به یې ویل چې د هغوی لوڼې د “پیریانو” تر اغېز لاندې دي او یوازې دی کولای شي درملنه یې وکړي. هغه به له خپل مذهبي مقام څخه ناوړه ګټه اخیسته او نجونې به یې په دې باور کړې چې که یې راز افشا کړي، نو کورنۍ به یې له خطر سره مخ شي.

اریا وايي چې هغه د دې سړي خبرې رښتیا ګڼلې او وېره یې لرله چې که څه ووایي، ناوړه پېښې به ورته رامنځته شي. دا یوازېنۍ پېښه نه وه؛ د راپور له مخې، عبدالحلیم د څو کلونو په اوږدو کې پر څو ښځو او کم عمره نجونو ورته کړنې ترسره کړې.

هغه به نجونې په داسې ځایونو کې لیدو ته هڅولې چېرې چې بل څوک نه وي، لکه موټر یا جلا کوټه. وروسته به یې هغوی وېرولې او جنسي ځورونه به یې پرې کوله. ځینې وخت یې د اړیکو ساتلو لپاره وسایل هم ورکول او یا به یې نجونې هڅولې چې له کور څخه پټې ووځي.

په دې قضیه کې، ځینې کورنۍ پخپله خپلې لوڼې د “درملنې” لپاره ور وړې وې، ځکه چې د هغوی له ستونزو سره د حل تمه یې درلوده.

په پای کې، محکمه عبدالحلیم خان ته د عمر بند سزا واوروله چې لږ تر لږه شل کاله بند پکې شامل دي. هغه د ماشومانو پر وړاندې د ناوړه چلند او جنسي تېري په څو تورونو مجرم وپېژندل شو، او اعتراف یې وکړ چې دا کړنې یې د کلونو په اوږدو کې ترسره کړې دي.

پولیسو هغه مهال پلټنې پیل کړې چې یوې قرباني د خپل ښوونځي له ډاکټر سره دا موضوع شریکه کړه. د قضیې ثبوت او محکومیت څو کاله وخت ونیو.

د قربانیانو له ډلې یوې ښځې، چې دلته یې “فرخ” بولو، وویل چې کورنۍ یې پر خبرو باور ونه کړ، چې دا چاره یې لا زیاته سخته کړه. هغې زیاته کړه چې تورن کس به دروغجنې کیسې جوړولې او ځان به یې د فوق العاده ځواک خاوند معرفي کاوه.

یوې څارنوالې ویلي چې دا قضیه د دې له تجربې څخه بې ساري وه، ځکه تورن کس به خلک د وېرو او خرافاتو له لارې کنټرولول. څېړونکي هم وايي چې کلتوري او ټولنیز عوامل د دې سبب کېږي چې قربانیان ډېر وخت چوپ پاتې شي.

د دې ډول پېښو اغېزې اوږدمهاله وي. قربانیان وایي چې دا تجربې د هغوی پر ژوند ژور تاثیر کوي او کلونه وروسته هم ورسره پاتې کېږي.

Kamran Zadran