د لوګر د پوهنې رئیس د کوچیانو له عالي لېسې څخه لیدنه وکړه
پل علم
د نشراتو مدیریت
سه شنبه، غویي ۴ مه
د لوګر ولایت د پوهنې رئیس ښاغلي الحاج مولوي عبدالرحمن حمیدي د کوچیانو له عالي لېسې څخه لیدنه وکړه.
هغه دا لیدنه نن له غرمې مخکې د یادې لېسې د اداري او تدریسي چارو د وضعیت څېړلو او هم د زده کوونکو د تعلیمي غوښتنو او ستونزو اورېدلو په موخه کړې ده.
نوموړي په دې لیدنه کې د دغې لېسې اداري او تدریسي چارې وڅېړلي او هم یې د زده کوونکو تعلیمي ستونزې او غوښتنې واورېدې.
د پوهنې رئیس زده کوونکي تعلیم او زده کړو ته وهڅول او له دوی څخه یې وغوښتل چې په خپلو درسونو کې بې غوري ونه کړي او ورته جدي پاملرنه وکړي.
د یادونې وړده ،چې د کوچیانو عالي لېسه د لوګر د پوهنې ریاست تر چتر لاندې په پل علم ښار کې فعالیت لري او شاوخوا ۳۰۰ زده کوونکي پکې په زده کړو بوخت دي.