محمد الله آرين

درې کونجه وړوکی ولايت، خو له ډیرو ستونزو او زهرو ډک دی، نه پکې سکون شته نه آرام، ډير وارې په ملي دردونو او نورو مسايلو په خپل يا مستعار نوم لیکنې وکړې خو د لوګر په اړه مې تر دې دمه هره ليکنه په خپل نوم کړې او دا لیکنه هم چې شونې ده په ډيرو ترخه ولږيږي په خپل نوم کوم logar new photo.
په دې ورځو کې مې نيږدې هره ورځ په رسنيو کې یو خبر د لوګر په اړه تر سترګو کيږي، کله ډرون برید کړی وي ملکي وګړي مړه وي، کله لاریون وي کله تحصن وي، کله وکیل په غصه وي د ولس د حق نارې وهي او کله بیا والي صيب په خپله بي بي قسم کوي چې څه مې زړه غواړي هغه کوم، لاس مو خلاص توره مو تیره او دا يي ښودلې هم ده ځکه څو تنه يي په مرمیو سوري سوری کړل.

نن بیا په رسنیو کې ددې ولايت امنيه قومندان اسحاقزی تور ږيری ډير ګرم دی، له سهاره مې يو پنځه وارې واوريدل چې وايي ځايي مخور او استازي مې په کارونو کې لاسوهنه کوي، مقررۍ غواړي، قراردادونه غواړي هغه غواړي دا غواړي، له ده سره د ولايتي شورا زيړپټکی ښاغلی عبدالولي وکيل هم مل دی او درګرده يي خبرې ور تايیدوي، خدای مو بیخ وباسه که چيرې رښتيا د لوګر له غمه مړه وی چې دا څو ورځې مو د شخصي غلاوو پر سر دومره رسنيز کړی دی ولې دا ۱۳ کاله په دې ولايت کې ستونزې نه وې، ځمکې نه غصبيدې، ناامني نه وه، لاسوهنې نه وې، اربکي سازي مو نه کوله، د پروژو پيسې او ان دوا درمل هغه مو په بډه ونه وهل.

زه که له قومندان څخه يوه پوښتنه وکړم چې قومندان صیب ته د لوګر د امنيه قومندان په توګه په څو ولسواليو کې لږ تر لږه نيمی حاکميت لرې؟ ځواب به يي څه وي، په سترګو را ننوتل او که د اوښ پل کيښودل. که بله پوښتنه وکړم چې قومندان صیب ستا کوم کار سم دی چې نن دې په کارونو کې لاسوهنه کيږي او خدای مه کړه کار به دې خراب شي، ځکه د لوګر خو هرڅه خراب دي، نه امنيت شته، نه ښه اداره شته، نه فعالې ولسوالۍ شته، نه بیارغونه پکې شوې، نه پکې کومه داسې لويه پروژه عملي کيږي. ښاغلی اسحاقزی ته خو ټول ټال د دوه نيم کيلومتره پل علم امنيه قومندان يي نه له ازرې خبريي نه هم له برکي برک، خروار، څرخ، محمدآغې يا خوښۍ څخه، باالاخره ولې او تر کله به خلک غولوۍ، آيا په لوګر کې د اکبر ستانکزي، والي او ښاروال تر منځ د ځمکې پر سر را پيدا شوې ستونزه حل لاره نلري، که حل لاره نلري راشۍ زه يي دروښيم او که حل لاره لري، والي غل نه وي، ښاروال غل نه وي ولې په حل لاره فکر نه کوي، که چيرې تاسو ټول يو لوري ته شی او اکبر بل لوري ته خو ملت په منځ کې پاتې شي آيا داسې ورځ به رانشي چې د ملت له قهر او غضب سره به مخ شی.

د ځمکو په غصب کې يي د ولايتي شورا، امنيه قومندانۍ او اربکيانو د نظرونو اړتيا څه ده، آيا د ولايتي شورا رييس په تیرو ۱۳ کلونو کې کله هم ويلي دي چې په لوګر کې ستونزه شته، دی خو تل وايي چې لوګر جوړ تيار دی امن او امان پکې دی هيڅ مشکل نشته د نورو ولايتونو د ولايتي شورا رييسان په ولايت کې په ستراتيژيکو مبارزينو بدل شوي دي که نه وي ورشه هغه ورځې په هرات کې د دې ولايت د ولايتي شورا رييس وحيد قتالي له لوري د انګور جوړ شوی نندارتون وګوره چې ده په څومره مهارت ددې ولایت د خوار بزګر غږ پورته کړ او څومره ښه يي مديریت کړی و چې ان سي ان ان، الجزيزې، بي بي او العربيه ټلويزيونونو پرې راپورونه جوړ کړي و، هغه لنډۍ را ياده شوه چې وايي:

په غټ پټکي دې شوم غلطه

زه دې له پکه سره څه خبره وومه

امنيه قومندان چې پورته د اونۍ سيدانو له پوستې او کښته تر کلنګاره نشي راتلی ولې د دې خبرو پر ځای پر امنيت، د پوليسو په مسلکي کولو، کار و اهل کار ته په سپارلو فکر نه کوي که بیا هم پلمه کوي چې زه کار اهل کار ته سپارم خو اکبر مې نه پريږدي، هلکه نن به دې اکبر نه پريږدي پرون دې څه کړي؟

کاش امنيه قومندان دا خبره يوه مياشت مخکې کړې وی، کاش امنیه قومندان يو کال مخکې داسې خبره رسنیزه کړې، وی، نن چې هرڅوک دا ډول غږ کوي زه په ډاډ وایم چې ګټې يي په خطر کې دي، نمرې او ځمکې يي له خولې وزي او کوښښ کوي د ځمکو د غصب له لړۍ سره د يو ځای کيدو په ترڅ کې د ولس پر ستوني پښه ور کيږدي او خپلې شومې موخې تر لاسه کړي.

زه چې څومره خبر يم په لوګر کې د ځمکې پر سر ستونزه چې ټول ټال ۱۲۰ نمرې دي د هرې ورځې په تيريدو لوييږي سيمه ايز ارګانونه چوپ دي، مرکزي دولت او په ټول کې ارګ چوپ دی. دا چوپتيا ډيره ستره مانا لري، لوګر په ملي کچه د طالبيزمښکار دی، په ښاري او مرکزي کچه بیا د سيافيزم، ځان ځانيزم،فساد،جيب ډکولو، اربکيزم او…..

يادې نمرې ټولې مخکې تر دې چې ملت يي په اړه پريکړه وکړي، شنه ساحه او که د استوګنې ساحه يي تثبیته شي، د اربکيانو پر قومندانانو، امنیه قومندان، يو نيم چاپلوس ملا او ديني عالم،ريیسانو او……ويشل شوي دي او پاتې اويا اتيا يي ښاروال محمد خان الفت چې ځان کاکه هم بولي او والي نيازمحمد اميري په خپل منځ کې سره ويشلي او څو وارې ما ترې دا خبره په مجلسونو کې اوريدلې چې موږ هم مصرف کړی دی ولايت موتر لاسه کړی دی بايد يو څه بچت وکړو.

ستونزو ته حل لارې نه لټول کيږي، ټول يو ډول ته ګډيږي، هلکو راشۍ که اسناد لرۍ، ملت ته مخه کړۍ، هرڅه ډاګيز کړۍ، اکبر ستانکزی تر تاسو ما ډير غندلی دی، ډيرې نيوکې مې پرې کړي دي مخامخ ورسره ناست يم، او تل مې مخامخ سپينې خبرې ورته کړي دي، که تاسو هم دومره باجرأته ياست راشۍ چې سره میدان ته شو او هرڅه ملت ته په ډاګه کړو خو دا چې تاسو تش تور پوې کوۍ د سياف او بل ږيرې نيسۍ څو مو لرې نکړي سياسي ملاتړ مو وکړي، تش رسنيز تورونه لګوۍ زه اوس اوس په دې باوري کيږم چې يو وخت غندلی اکبر ستانکزی سم او تاسو ټول غله راونه خيژۍ ځکه له اداګانو مو همداسې ښکاري.

زه په لوګر کې سيافيزم نه غواړم، زه په لوګر کې د سياف تر ږیرې لاندې غلا نه غواړم، زه په لوګر کې نور له تنظيمي جوړښته کرکه لرم،زما لوګر نور بايد د تنظيمي سهميي برخه نشي، زه نور لوګر د سيالو ولايتونو په قطار کې سيال ولايت غواړم، زه غواړم باب الفساد په باب الاصلاح بدل شي، زما ناره هيڅوک نه اوري.

باالاخره يوه وړاندوينه کوم، وايي د خدای قهر او د ولس زور بیا نشي را کابو کيدای، لوګر د روس د يرغل پر مهال ډير وارې ستر ستر پوځي قطارونه په لور او بیل باندې مات کړی دي، دوه درې وارې يي په لور، چيره ايز ټوپک او چاړو باندې ولسوالۍ نيولي، زه چې څومره ګورم، والي، مرکزي دولت، د فراهي شخصي اداره یا د سيمه ايزو ارګانونو هغه همداسې يو وخت ته په تمه دي، پرون که د اکبر ستانکزي خبرې دروغ هم وې، نن سبا ځکه پرې ملت باور کوي چې هغه ملت ته اسناد وړاندې کوي،تاسو تش رسنيز تورونه لګوۍ.

ولسه! که را پورته نه شې، جرأت ونکړې، په خپله لاس په کار نشې، نو پوه شه چې غرق شوې، او ستا دارايي د غلو په لاس کې ورکول شوه او د غلو په چاغيدو سره به هره ورځ ملت ډنګر او باالاخره به له پښو ولويږي.

منبع: افغان ځواک