حفيظ الله چا د امريکايانو جاسوس کړ !؟ پټ اسناد !

Dawood Amin:

حفيظ الله امين په ۱۹۷۸ ز کال د جون په مياشت کې نيويارک ته سفر درلوده.

دا هغه وخت و چې نوموړی د افغانستان د بهرنیو چارو وزیر و او په ملګرو ملتونو کې د ګډون لپاره امریکا ته تللی و.

د کارمل د ډلې لخوا روسانو ته ويل شوي وه چې امين د کولمبيا په پوهنتون کې د زده کړو پر مهال CIA جذب کړی و.

په دې سفر کې امين د KGB تر څار لاندې و. د KGB په پټو اسنادو کې راغلي چې امین په نیویارک کې له هغو امریکایي چارواکو او کسانو سره جلا او پټې لیدنې وکړې چې د رسمي پلاوي په اجنډا کې شاملې نه وې.

په دغه سفر کې د افغانستان د پلاوي ځینو غړو چې د پرچم ډلې پورې تړلي وو مسکو ته راپور ورکړ چې امین په هوټل او د ناستو پر مهال له امریکایانو سره خورا ګرمې او دوستانه خبرې کولې او د شوروي د ډیپلوماتانو سره یې چلند سوړ و.

دا چې امين هوښيار سړی و، د سفر په جريان کې متوجه شو چې ممکن زه د KGB تر څار لاندې وم نو له نيويارک څخه پاريس ته ستون شو.

هلته يې هم غېرې رسمي ليدنې وکړې خو روسانو دا چاره د خپل ځان په حق کې د غولونې يوه ډرامه وبلله.

امین غوښتل په پاریس کې د فرانسې او لوېدیځو هېوادونو له استازو سره په غیر رسمي توګه وګوري ترڅو د افغانستان لپاره له شوروي پرته د مرستو نورې لارې هم پیدا کړي.

نور محمد تره‌ کي ته چې کابل کې د امین د دې پلان راپور ورسېد، سمدستي یې ورته ټلیفون وکړ او په خورا ټینګار یې ورته وویل: ملګری امین ! په پاریس کې مه پاتې کېږه، سمدستي کابل ته راشئ، دلته څه اړینې خبرې لرو. امین مجبور شو چې خپل پټ ملاقاتونه لغوه کړي او کابل ته ستون شي.

د نیویارک د دغه سفر اسناد او د امین مشکوک چلند د دې لامل شو چې روسان نور هم شکمن شي چې حفيظ الله امين امريکايانو جذب کړی دی.

د تره کي له وژلو وروسته کله چې حفيظ الله امين واکمن شو. د امریکا د سفارت له شارژدافیر بروس امستوتز سره یې پرله‌ پسې لیدنې وکړې.

روسانو د نیویارک د سفر د موندنو او د دغو لیدنو پر بنسټ پرېکړه وکړه چې امین د افغانستان د کمونېستي نظام سوسیالیستي لاره بدلوي او غواړي هېواد د واشنګټن غېږې ته وغورځوي، ځکه یې نو د هغه د وژلو امر صادر کړ.

نوټ: ما تراوسه هیڅ داسې اسناد ونه موندل چې ثابته کړي چې حفيظ الله امين د امريکايانو جاسوس و. په دې اړه که تاسو سره څه مستند مالومات وي راسره يې شريک کړئ.