سید اسحاق ګیلاني بي‌بي‌سي ته:

د طالبانو راتګ سره له سیاست څخه لیرې یم، ژوند بیخي سخت تېرېږي او ان په هفتو هفتو د خپل کور د بهر دروازې ته هم نه نږدې کېږم.

هغه زیاتوي: «یو څو ځل مې سراج الدین حقاني او د طالبانو استخباراتو رییس سره دوه کاله مخکې ولیدل، خو بیا چا سره نه یم ناست».

د ولسي جرګې دا پخوانی غړی چې د پیر ګیلاني کورنۍ سره تړاو لري، وړاندې وویل: «ممکن طالبان نه غواړي چې مونږ سره کیني او یا هم ښایي وخت ونه لري».

د بي بي سي په تازه ویډیو کې ښکاري چې د دغه پیر یوه ډله مریدان د هغه کور ته ورننوځي او دی بیا وایي چې بس اوس یوازې له همدوی سره د کور کلي، مالدارۍ او زراعت خبرې کوي.

د پیرانو دا کورنۍ چې په غزني، پکتیکا، لوی کندهار او شمالي ولایتونو کې مریدان لري، د کورنۍ ځنې غړي یې طالبانو وډبول او ونیول.

پخوا به د دې کورنۍ غړي په لویو پروتوکولونو ولایتونو ته سفرونه کولو، مریدانو او پیر پرستانو به یې پراخ هرکلی کاوه، خو اوس پرې طالبانو سخت بندیزونه لګولي دي.