زېبا اپريدۍ

آغلې زيبا آپريدۍ د خيبر د سردرو ويړې پښتونخوا يوه ننګياله پښتنه شاعره ليکواله سماجي ، سياسي مبارزه ده د عوامي نيشنل پارټۍ د پيښور ښار کشره سکتره ده او د خوېندې ادبي لښکر خيبر پښتونخوا مشره سکتره ده په خپله ژبه ، ادب ، کلتور او قام ورکه مئينه هم ددغې پښتنې مينې ليونتوب د خيبر پښتونخوا ګوټ ، ګوټ ته ادبي ، کلتوري دستورو ته د ځان رسولو سره څو وارې افغانستان کابل ته هم لاړه ده .

د آغلې زيبا آپريدۍ د ژوند ملګرے د پښتو ژبې ستر شاعر اديب ، دانشور ښاغلے فضل مومند دے . فضل مومند لکه د غر د آغلې زيبا په شا ولاړ دے او د هغې ادبي، سماجي او سياسي هلې ، ځلې ستائي او خراج ور وړاندې کوي . مونږ هم د آغلې زيبا اپريدۍ دغه هلې، ځلې ستايو خراج ور وړاندې کوو. د آغلې زيبا يو غزل نما نظم چې مختصر بحر کښې يې هر شعر مقصدي دے او د پښتو د کلاسک، جديد دور او د خپل عصر ځنې شاعران، ليکوالان ياد کړي او ستائيلي دي د هغې دغه نظم له تاسو سره شريک کوم .

اقبال حسين افکار

لیک: زیبا اپریدۍ

د سپرلي تانده غوټۍ يم

زه د غرونو ښاپیرۍ يم

له رقيبه نه ويرېږم

زه سرشاره افريدۍ يم

پښتنه ډکه له ننګه

د وختونو ملالۍ يم

خپل وطن باندې مئينه

ددې خاورې غرڅنۍ يم

زہ غزل یم‌ هم ټپه یم

زہ چاربیته نیمکۍ یم

مينه مينه يم وفا يم

د شپونکي خوږه شپېلۍ يم

مدام هسکې سترګې ګرځم

ننګيالۍ يمه زمرۍ يم

د غليم د سترګو خار يم

د خوشال بابا لمسۍ يم

د غنی په فلسفه یم

د رحمان د شعر کړۍ یم

زه چپه د اباسین یم

د حمزه بابا بچۍ یم

د خاطر خیبر په خاوره

یو وړه شانتی کلۍ یم

د بانو سلمه د مینی

دکلثوم وړه ګوډۍ یم ..

د اظهار په ژبه وایم

ته بورا زه لولکۍ یم

قلندر او راز به ستایم

پُښتنه یم ننګیالۍ یم

د سیماب په لار به ځمه

یو طوفان یوہ,سیلۍ یم

صنوبر کاکاجی زہ ھم

سلسله د زندګۍ یم

ګجو خان احمد خان یاد کړم

بس یو آہ یوہ سلګۍ یم

د اجمل خټک د خاورې

لولکۍ یم ننګیالۍ یم

د عابد پہ پیښور کښې

ترانہ د ازادئۍ یم

د سائل د ارمانونو

د ماښام سپینه سپوږمۍ یم

پۀ مومندو کښې درنه یم

اپریدۍ یم اپریدۍ یم

د ایمل د کور سالو یم

د دریا چې کړوسۍ یم

د حسرت د باغ بلبله

د ګلونو غنچکۍ یم

د امان نصرت د مينې

ژوند پرسته شین خالئ یم

د افکار د فکر شمع

بلیدونکې یم لیتکۍ یم

د شيدا د چمن ګل يم

د حميد د باغ غوټۍ يم

د ميرويس بابا شمله یم

د وختونو ابدالۍ یم

د فضل دتودې مينې

د خيالونو شهزادګۍ يم

زیبا ډېر کۀ وخت بدل شو

زہ ولاړہ په سيالۍ یم

ــــــــ ـــ ــــ زیبا اپریدۍ ـ