د لوګر د ولایتي شورا پخوانۍ غړې، نفیسه هجران وایی

د لوګر د ولایتي شورا پخوانۍ غړې، نفیسه هجران، د پخواني ولسمشر محمداشرف غني د هغو څرګندونو ملاتړ کړی چې د افغانستان د اوبو د مدیریت په اړه یې کړې وې. هغې ویلي، که د جمهوري نظام د اوبو د مدیریت او بندونو جوړولو پلانونه بشپړ شوي وای، ښايي کابل او د هېواد نورې سیمې به د اوبو له اوسني سخت کمښت سره نه وای مخ شوې.

اشرف غني په خپل وروستي پوډکاسټ کې د کابل د اوبو کمښت «شرم وړ حالت» بللی او ویلي یې دي چې د جمهوري نظام پر مهال د اوبو د مدیریت لپاره ستراتیژیک پلانونه چمتو شوي وو، خو عملي نه شول. نفیسه هجران هم ټینګار کړی چې مسلکي او وطنپالو کادرونو ته باید د خدمت فرصت ورکړل شي، ځکه د هېواد پرمختګ د وړ او ژمنو کسانو په هڅو پورې تړلی دی.